Racyja

Самаўрадаўцы з Сухаволі могуць закрыць тры пачатковыя школы ў гміне. У планах ёсць ліквідацыя асяродкаў у Яцвязі, Чырвонцы і Вольцы. Адна з прапановаў - пакінуць толькі пачатковыя класы.

Старэйшыя дзеці павінны ездзіць у зборную школу ў Сухаволі. Як адзначае бурмістр Сухаволі Казімеж Марцішэль, гміна не можа фінансаваць маленькія школы у час, калі павінна эканоміць на ўсім.

- 15 лютага будзе сесія гарадской рады, на якой будзе прынята рашэнне аб рэарганізацыі гэтых школ. Затым будзем паведамляць куратарам, бацькам. І калі будзе згода, то напрыканцы лютага прымем рашэнне пра рэарганізацыю гэтых школ.

Бацькі не пагаджаюцца з гэтым, каб гміна эканоміла за кошт іх дзяцей. Жыхары вёскі Чырвонка папярэджваюць, што не дазволяць зачыніць школу. Прапануюць, каб злучыць школы ў Вольцы і Чырвонцы замест іх ліквідаваць.

Жыхары Чырвонкі:

- Настаўнікі гаварылі паміж сабой, што калі змены да Чырвонкі дойдуць, што ў адным класе будзе 17-20 дзяцей і для аднаго настаўніка пільнаваць гэтых дзяцей будзе складана.

- Каб на сёмую раніцы завезці дзяцей, напрыклад, да Сухаволі, то трэба ўстаць а шостай ці нават раней. А калі на вуліцы -26С*, як было нядаўна, то гэта трагедыя. 

Паводле слоў дырэктара пачатковай школы ў Чырвонцы Божэны Наконэчнай, працягваюцца размовы з бурмістрам і ўправай гміны Сухаволя. Пытанне рэарганізацыі трох школ будзе вырашана на бліжэйшым пасяджэнні ўправы гміны.

Радыё Рацыя

Фота telegraf.by