Racyja

Беларуская спявачка, супрацоўніца Беларускай дзяржаўнай філармоніі Таццяна Грыневіч-Матафонава прэзентуе адразу тры плыты з беларускімі спевамі. 

Першая плыта мае назву «З новым годам!» і ўяўляе сабой дзіцячыя навагоднія і зімовыя песні ды вершы ў выкананні сына спявачкі Адася Матафонава, а таксама спевака Аляксея Крукоўскага. Як зазначае Таццяна Грыневіч-Матафонава, дадзеная плыта нясе адукацыйны характар і зроблена для таго, каб у беларускіх дзіцячых садках і школах дзеці маглі развучваць беларускамоўныя песні і вершы.

Другая плыта, якая мае назву «Шыпшына», уяўляе сабой збор беларускіх рамансаў у выкананні Таццяны Грыневіч-Матафонавай. Трэці ж дыск запісаны ў супрацы з вядомым беларускім бардам Сяржуком Сокалам-Воюшам, які цяпер жыве ў Злучаных Штатах Амерыкі. "Усе тры альбомы былі запісаны цягам мінулага года і таму было вырашана прэзентаваць іх разам,"- кажа Таццяна Грыневіч-Матафонава.

- Ужо ў верасні былі гатовы першыя два дыскі. А перад Новым годам прыйшла ідэя, што не хапае нашым дзеткам дзіцячых песень пра Новы год. За два тыдні быў запісаны гэты дыск. А зараз гэта ўсё разам прэзентуецца.

Прэзентацыя трох плыт адбудзецца ў мінскім музеі Янкі Купалы. На канцэрце прагучаць песні з усіх трох альбомаў у выкананні спявачкі Таццяны Грыневіч-Матафонавай і яе сына Адася Матафонава. Распачнецца імпрэза а 18-й гадзіне па беларускім часе.

Аляксей Красоўскі, Радыё Рацыя, Мінск.

Фота horki.info