Racyja

Партыя БНФ папярэджвае беларускае грамадства: экспансія кітайскага капіталу можа прывесці да негатыўных наступстваў.

Па словах старшыні партыі Аляксея Янукевіча, выгоды супрацоўніцтва з Кітаем значна меншыя, чым небяспекі. Ужо адкрыты крэдытныя лініі на 16 мільярдаў долараў. Гэта звязаныя крэдыты, якія заганяюць беларускую эканоміку ў жорсткую залежнасць ад Кітая і яго не самых лепшых у свеце тэхналогіяў.

- Вельмі жорсткія ўмовы выстаўляюць пры крэдытаванні, даюць звязаныя крэдыты, якія павінны быць звязаны не толькі з кітайскімі матэрыяламі і тэхналогіямі, аднак і з кітайскай працоўнай сілай. Мы бачым, што пад гэтыя праекты павялічваеццца колькасць кітайцаў, якія прыязджаюць у Беларусь працаваць. І па той інфармацыі, якая ёсць у нас, заробкі кітайцаў значна большыя, чым у беларусаў. Хоць беларусы абсалютна нічым не саступаюць кітайцам.

Па словах старшыні Партыі БНФ, таму Беларусь у выніку не атрымлівае значных плюсаў ад падобнага супрацоўніцтва з Кітаем, у той жа час Кітай мае ад супрацоўніцтва відавочныя выгоды. Але кіраўніцтва Беларусі вымушана ісці на яго ў пошуках рэсурсаў. “Зараз па вядомых прычынах крытычна абмежаваны кантакты з Захадам. Расія гатова прадстаўляць рэсурсы, але абумоўлівае іх жорсткімі патрабаваннямі аб продажы беларускай маёмасці. Таму выбару няма,” – кажа Аляксей Янукевіч.

Генадзь Барбарыч, Радыё Рацыя. 

Фота belarus.by