Racyja

Уладзіславу Кавалёву, якому вынесены смяротны прысуд, пішуць нават незнаёмыя людзі, распавяла маці асуджанага за тэракт у мінскім метро Любоў Кавалёва. Пра гэта стала вядома з ліста асуджанага, а таксама ў часе ранейшай яго сустрэчы з сястрой Таццянай.

Паводле маці, гэта значная падтрымка для яе сына:

- І калі Таня хадзіла да яго на спатканні, то яна казала, што людзі падтрымліваюць і нас, і яго, што яны не вераць у іх вінаватасць, што віна не была даказаная ні падчас следства, ні падчас суда. Такім чынам, грамадства – за хлопцаў. Таму ён усім пераказваў вялікі дзякуй за падтрымку.

У гэтым месяцы чакаецца паседжанне камісіі па памілаванні, на якой павінны разгледзець хадайніцтва Уладзіслава Кавалёва. Другі асуджаны, Дзмітры Канавалаў, прашэння аб памілаванні не падаваў, але яго справа ў любым выпадку будзе разглядацца на камісіі.

Таксама ў Камітэт ААН па правах чалавека накіраваная скарга на прысуд Уладзіславу Кавалёву. Любові Кавалёвай у той жа час адмовілі ў сустрэчы з кіраўніком Беларусі Аляксандрам Лукашэнкам.

Яна Запольская, Радыё Рацыя.

Фота prava.vitebsk.cc