Racyja

На паседжанні міністраў замежных спраў краін Еўразвяза, запланаваным на 27 лютага, хутчэй за ўсё можна чакаць пашырэння санкцый у дачыненні да чыноўнікаў беларускага рэжыму.

Такое меркаванне выказаў сустаршыня аргкамітэта Беларускай Хрысціянскай Дэмакратыі Віталь Рымашэўскі пасля сустрэчы з дырэктарам дэпартамента Еўрапейскай службы знешняга дзеяння Еўразвяза Гунарам Вігандам.

- Ёсць пазіцыя Еўразвяза, якая была сёння агучана, што 27 хутчэй за ўсё рыхтуецца павелічэнне крытэрыяў, па якіх людзі будуць трапляць у спіс неўяздных. Чакаецца павелічэнне катэгорый і мэтаў у адносінах да тых людзей, якія трапляюць у спіс, і колькаснае павелічэнне гэтага спісу. Таму трэба 27 лютага чакаць павелічэння колькасці неўяздных чыноўнікаў у Еўразвяз.

Віталь Рымашэўскі таксама паведаміў, што падчас сустрэчы еўрапейскага дыпламата з прадстаўнікамі палітычных партыяў была агучана супольная заява аб тым, што ніводная арганізацыя за мяжой не мае права выказвацца ад імя беларускай апазіцыі.

- Была выказана такая пазіцыя, што офіс "За дэмакратычную Беларусь" і іншыя офісы за мяжой Рэспублікі Беларусь, не маюць права прадстаўляць усю дэмакратычную апазіцыю без узгаднення грамадзянскаю супольнасцю. Бо інфармацыя пра тое, што ў Беларусі не падтрымліваюцца ініцыятывы офісаў, успрымаецца досыць адэкватна. Супольнай пазіцыі, на жаль, няма. Тыя людзі, якія выступалі раней супраць эканамічных санкцый, і нават выказваюцца, што яны і за кропкавыя санкцыі, сёння выступаюць нават супраць гэтых сімвалічных санкцый.

Іншая частка апазіцыі, у тым ліку і Беларуская Хрысціянская Дэмакратыя, выступае за пашырэнне санкцыяў і іх адмену ў выпадку саступкаў рэжыму ў бок дэмакратыі.

Валянціна Лаеўская, Радыё Рацыя.

Фота  telegraf.by