Racyja

Бабруйскія палітычныя партыі і незалежныя прафсаюзы выступаюць за актыўны байкот выбараў. Рада дэмакратычных сілаў Бабруйска выступіла з адмысловай заявай.

У ёй дэмакратычныя сілы патрабуюць вызвалення і рэабілітацыі палітвязняў, уключэння ў выбарчыя камісіі прадстаўнікоў апазіцыі, адмены абмежаванняў на дзейнасць СМІ, партыяў і арганізацыяў, сходаў і мітынгаў. “Мы заклікаем да актыўнага байкоту выбараў,” – кажа адна з падпісантак заявы, каардынатар аргкамітэта па стварэнні БХД у Бабруйску Таіса Кабанчук.

- Мы вырашылі, што трэба людзям гаварыць сапраўды праўду, што выбараў няма і няма чаго туды хадзіць. І гэта мы будзем тлумачыць людзям і будзем заклікаць, каб яны ўвогуле не ішлі на выбарчы ўчастак. Бо толькі чалавек паставіць там подпіс, а яго голас палічаць туду, куды трэба ўладзе і таму кандыдату, які будзе занесены ў спіс Лукашэнкам. Толькі такія людзі змогуць прайсці, а тым больш у Палату прадстаўнікоў. Таму мы выступілі з такой пазіцыяй і будзем яе тлумачыць людзям падчас выбарчай кампаніі.

Заяву Рады дэмакратычных сілаў Бабруйска аб пазіцыі актыўнага байкоту падпісалі прадстаўнікі АГП, БХД, БНФ, Маладой хрысціянскай дэмакратыі, сацыял-дэмакратычнай партыі «Грамада», Руху «Гавары праўду!», партыі «Справядлівы свет», незалежнага прафсаюза радыёэлектроннай прамысловасці.

Анна Шайкоўская, Радыё Рацыя.