Racyja

Адзін са шматлікіх кандыдатаў у прэзідэнты, у прыватнасці ад Партыі БНФ Рыгор Кастусёў, выступіў з адкрытым зваротам у Адміністрацыю Прэзідэнта і яшчэ у некалькі ўплывовых установаў. Нагодай для звароту стала 20‑я гадавіна абвяшчэння дзяржаўнага суверэнітэту Рэспублікі Беларусь.

Каб сказаць нешта болей, трэба спярша звярнуцца да сутнасці справы. Кастусёў асабіста перадаў тэкст звароту, у якім усё гаворыцца ўзнёсла, па-расійску высокапарна. Нельга праігнараваць гэты тэкст і таму яго цытую.

"Як і 20 гадоў таму, БНФ верны прынцыпам, абвешчаным у Дэкларацыі. У той жа час па‑ранейшаму застаюцца палітычныя сілы, якія гатовыя да рэвізыі нацыянальнага выбару, што быў зроблены беларусамі дваццаць год таму. Імперскія амбіцыі, скіраваныя супраць прынцыпаў Дэкларацыі 27 ліпеня, будуць асуджаныя на паразу незалежна ад формы выяўлення гэтага імперыялізму, нават калі ён апране ліберальную тогу", — мяркуе Рыгор Кастусёў.

Намеснік старшыні Партыі БНФ наіўны, бо ён заклікаў нарэшце правесці у Беларусі справядлівыя выбары. "Я заклікаю ўсе палітычныя сілы краіны, партыі, дзяржаўныя і грамадскія структуры аб’яднаць намаганні і не дапусціць нарастання пагрозаў дзяржаўнаму суверэнітэту нашай краіны. Гэта магчыма толькі пры ўмове правядзення бліжэйшай выбарчай кампаніі ва ўмовах дэмакратычнай канкурэнцыі і свабоды выбару. Калі кампанія будзе весціся па звыклым адміністратыўна‑рэпрэсіўным сцэнары, то гэта зробіцца важкім козырам у руках знешніх сілаў, якія зацікаўленыя у дэстабілізацыі і разбурэнні нацыянальнага суверэнітэту Рэспублікі Беларусь, з мэтай штучнага стварэння падставаў для ўмяшальніцтва ва ўнутраныя справы нашай краіны".

Гляньце, колькі Кастусёў наплёў. Можа гэта і слушнае, толькі гэта такое слушнае, як заявіць, што два плюс два будзе чатыры. Справялівыя выбары у Беларусі, нават самыя справядлівыя ў свеце, ні у чым не дапамогуць перамагчы Лукашэнку. Нават тая падтрымка ці непадтрымка з боку Расіі нічога не вырашыць. Беларусы па свайму менталітэту хочуць мець гаспадара. Гэта можа быць расійскі цар, польскі кароль, ці цяперашні прэзідэнт. Ім усё роўна: мае быць гаспадар, а гаспадар усё найлепей ведае. Гаспадар як звычайна паводзіць сябе правільна, а калі нешта пайшло не так, дык вінаватыя тыя злыдні, памочнікі, міністры ці сакратары.

Няхай шаноўны Спадар Кастусёў, гэтак і іншыя кандыдаты, не выстаўляе сябе на смех. Ён набярэ максімум 1-2 працэнты галасоў. Можа ў якасці кандыдата ў прэзідэнты ён стане больш вядомым. Аднак большая вядомасць не азначае галоўнага - стаць прэзідэнтам. 

Кастусь Бандарук, Радыё Рацыя